Dhanteras Katha

Pauranik kathaon ke anusaar, ek baar Yamraj ne apne dooton se poochha ki, "Kya jeevon ke praan harte samay tumhein kabhi kisi par daya bhi aati hai?" Dooton ne sankoch karte hue bataya, "Ek baar ek ghatna ne hamara hriday bhi jhakjhor diya tha."

Dooton ne katha sunai ki Satya naamak raja ke putra the 'Hans'. Unka vivaah hua tha. Ek din kisi jyotishi ne bataya ki shaadi ke chauthe din hi is rajkumar ki mrityu ho jayegi. Is baat se bhaybheet hokar navvivahita rajkumari ne apne pati ki raksha ka pran liya.
Shaadi ke chauthe din rajkumari ne mahal ke chaaron or bahut saare sone-chandi ke sikke aur aabhushan rakh diye, aur chaaron taraf roshni kar di. Jab Yamraj rajkumar ke praan lene ke liye sarp ka roop lekar aaye, to chakachaundh roshni aur ratnon ki chamak se unki aankhen chaundhiya gayin. Ve andar pravesh nahin kar paaye.

Yamraj ne haar kar us navvivahit jode ke praan nahin liye aur ve wapas laut gaye. Tab se yah maanyata hai ki Dhanteras ke din ghar ke mukhya dwar par Yamraj ke naam ka deepdaan karne aur Lakshmi-Dhanvantari ki pooja karne se ghar mein akaal mrityu aur sankat kabhi nahin aate.