Govardhan Ji Ki Katha

Govardhan Puja ki katha ke anusaar prachin kaal mein Deepawali ke agle din Braj mein Indra Dev ki pooja ki jaati thi. Logon ka maana tha ki Indra Dev varsha karte hain, isliye unki pooja karne se achchi fasal aur sukh-samriddhi prapt hoti hai. Tab Bhagwan Shri Krishna ne Brajvasiyon ko samjhaya ki humein Indra Dev ke sthan par Govardhan Parvat, gaayon, van aur prakriti ki pooja karni chahiye, kyunki yahi hamare jeevan ka palan-poshan karte hain. Shri Krishna ne yah bhi bataya ki gobar pavitra hota hai aur iska upyog kheton mein karne se ann aur aushadhiyan utpann hoti hain.

Brajvasiyon ne Shri Krishna ki baat maan li aur Indra pooja chhodkar Govardhan Parvat ki pooja ki tatha Annakut ka bhog arpit kiya. Yah dekhkar Indra Dev bahut krodhit ho gaye aur unhone Braj mein lagataar saat din tak bhayankar varsha kar di. Charon or jal bhar gaya aur sabhi log bhaybheet ho gaye. Tab Bhagwan Shri Krishna ne apni kanishtha ungli par Govardhan Parvat ko utha liya aur sabhi Brajvasiyon, gaayon tatha jeev-jantuon ko uske neeche surakshit aashray diya.

Saat din ke baad Indra Dev ko apni bhool ka ehsaas hua aur unhone Bhagwan Shri Krishna se kshama maangi. Tab Shri Krishna ne unhe ahankaar tyagkar vinamrata apnane ka updesh diya.

Tabhi se Kartik Shukla Pratipada ke din Govardhan Puja aur Annakut Utsav manaya jaata hai. Is din gobar se Govardhan Parvat ka swaroop banakar uski pooja ki jaati hai, Annakut ka bhog lagaya jaata hai aur Bhagwan Shri Krishna ki parikrama ki jaati hai. Maanyata hai ki jo bhakt shraddha aur bhakti ke saath Govardhan Puja karta hai, us par Bhagwan Shri Krishna ki kripa sadaiv bani rehti hai.॥