Pitar Paksha Ki Katha

Pitra Paksha ki pauranik katha ke anusaar, Joge tatha Bhoge do bhai the. Dono alag-alag rehte the. Joge dhanwaan tha aur Bhoge nirdhan. Dono mein paraspar bada prem tha. Joge ki patni ko dhan ka abhimaan tha, kintu Bhoge ki patni badi saral hriday thi.

Pitra Paksha aane par Joge ki patni ne usse pitaron ka Shraddh karne ke liye kaha. Joge ise vyarth kaarya samajhkar taalne ki cheshta karne laga, kintu uski patni samajhti thi ki yadi aisa nahi karenge to log baatein banaayenge.

Phir use apne mayke walon ko daawat par bulaane aur apni shaan dikhaane ka yah uchit avsar laga. Atah vah boli, "Aap shayad meri pareshaani ki wajah se aisa keh rahe hain, kintu ismein mujhe koi pareshaani nahi hogi. Main Bhoge ki patni ko bula loongi. Dono milkar saara kaam kar lengi."

Phir usne Joge ko apne peehar nyauta dene ke liye bhej diya. Doosre din uske bulaane par Bhoge ki patni subah-sawere aakar kaam mein jut gayi. Usne rasoi taiyaar ki. Anek pakwaan banaaye, phir sabhi kaam niptaakar apne ghar aa gayi. Aakhir use bhi to pitaron ka Shraddh-Tarpan karna tha.

Is avsar par na Joge ki patni ne use roka, na vah ruki. Sheeghr hi dopahar ho gayi. Pitar bhoomi par utare. Joge-Bhoge ke pitar pehle Joge ke yahaan gaye to kya dekhte hain ki uske sasuraal wale vahaan bhojan par jute hue hain.

Niraash hokar ve Bhoge ke yahaan gaye. Vahaan kya tha? Maatra pitaron ke naam par "Agiyari" de di gayi thi. Pitaron ne uski raakh chaati aur bhookhe hi nadi ke tat par ja pahunche.

Thodi der mein saare pitar ikatthe ho gaye aur apne-apne yahaan ke Shraddhon ki badhaai karne lage. Joge-Bhoge ke pitaron ne bhi apni aapbeeti sunaai.

Phir ve sochne lage, "Agar Bhoge samarth hota to shayad humein bhookha na rehna padta, magar Bhoge ke ghar mein to do june ki roti bhi khaane ko nahi thi."

Yahi sab sochkar unhein Bhoge par daya aa gayi. Achaanak ve naach-naachkar gaane lage:

"Bhoge ke ghar dhan ho jaaye,
Bhoge ke ghar dhan ho jaaye."

Saanjh hone ko hui. Bhoge ke bachchon ko kuch bhi khaane ko nahi mila tha. Unhone maa se kaha, "Bhookh lagi hai."

Tab unhein taalne ki garaj se Bhoge ki patni ne kaha, "Jao! Aangan mein haudi aundhi rakhi hai, use jaakar khol lo aur jo kuch mile, baantkar kha lena."

Bachche vahaan pahunche to kya dekhte hain ki haudi moharon se bhari padi hai. Ve daude-daude maa ke paas pahunche aur use saari baatein bataayin.

Aangan mein aakar Bhoge ki patni ne yah sab kuch dekha to vah bhi hairaan rah gayi.

Is prakaar Bhoge bhi dhanwaan ho gaya, magar dhan paakar vah ghamandi nahi hua.

Doosre saal ka Pitra Paksha aaya. Shraddh ke din Bhoge ki stri ne chhappan prakaar ke vyanjan banaaye. Brahmanon ko bulaakar Shraddh kiya. Bhojan karaaya aur dakshina di.

Jeth-Jethani ko sone-chaandi ke bartanon mein bhojan karaaya. Isse pitar bade prasann tatha tript hue.