Chandraghanta Mata Katha

Maa Durga ki teesri shakti hain Chandraghanta. Navratri me teesre din isi Devi ki pooja-aaradhana ki jaati hai. Devi ka yeh swaroop param shantidayak aur kalyankari hai. Isiliye kaha jata hai ki hume nirantar unke pavitra vigrah ko dhyan me rakhkar sadhana karni chahiye. Unka dhyan hamare ihalok aur parlok dono ke liye kalyankari aur sadgati dene wala hai. Is Devi ke mastak par ghante ke aakaar ka aadha chandr hai. Isiliye is Devi ko Chandraghanta kaha gaya hai. Inke sharir ka rang sone ke samaan bahut chamkeela hai. Is Devi ke das haath hain. Ve khadg aur anya astr-shastr se vibhushit hain. Sinh par savaar is Devi ki mudra yuddh ke liye uddhat rehne ki hai. Inke ghante si bhayanak dhwani se atyachaari danav-daitya aur raakshas kaampte rehte hain. Navratri me teesre din isi Devi ki pooja ka mahatva hai. Is Devi ki kripa se saadhak ko alaukik vastuon ke darshan hote hain. Divya sugandhiyon ka anubhav hota hai aur kai tarah ki dhwaniyan sunai dene lagti hain. In kshanon me saadhak ko bahut saavdhan rehna chahiye. Is Devi ki aaradhana se saadhak me veerta aur nirbhayata ke saath hi saumyata aur vinamrata ka vikas hota hai. Isliye hume chahiye ki man, vachan aur karm ke saath hi kaya ko vihit vidhi-vidhan ke anusaar parishuddh-pavitra karke Chandraghanta ke sharanagat hokar unki upasana-aaradhana karni chahiye. Isse saare kashton se mukt hokar sahaj hi param pad ke adhikari ban sakte hain. Yeh Devi kalyankari hai.