Karwa Mata Katha

Karwa Chauth ki pauranik katha ke anusaar, praacheen kaal mein Dwij naamak ek Brahman ke saat putra aur Veeravati naam ki ek kanya thi.

Veeravati pehli baar Karwa Chauth vrat ke din bhookh se vyaakul hokar prithvi par girne lagi. Tab uske saat bhai yeh dekhkar rone lage. Unhone apni behen ka jal se munh dhulaya. Phir ek bhai ghar ke vriksh par chadhkar chhalni mein deepak dikhate hue behen se bola, “Dekho, Chandra Dev nikal aaye hain. Unhe arghya dekar bhojan grahan kar lo.”Tab behen ne Chandra Dev ko arghya dekar bhojan kar liya.Pehle kaur mein baal nikla, doosre kaur mein chheenk aa gayi aur teesra kaur khaane se pehle hi sasuraal se bulaava aa gaya. Sasuraal pahunchkar usne dekha ki uska pati mara hua pada hai.

Sanyog se wahaan Indrani aayin. Apne pati ki yeh dasha dekhkar Veeravati vilaap karne lagi aur boli, “He Maa! Yeh kis apraadh ka phal mujhe mila hai? Kripya mere pati ko jeevit kar do.”Indrani ne kaha, “Tumne Karwa Chauth vrat mein Chandra Dev ke uday hone se pehle hi arghya dekar vrat ka paalan poora kar liya tha. Yeh sab usi ka phal hai. Atah ab tum baarah mahine ke Chauth vrat aur Karwa Chauth vrat ko shraddha aur bhakti ke saath vidhipoorvak karo. Tab tumhara pati punah jeevit ho uthega.”

Indrani ke vachan sunkar Veeravati ne vidhipoorvak baarah mahine ke Chauth vrat aur Karwa Chauth vrat ko badi bhakti-bhaav se kiya. In vraton ke prabhaav se uska pati punarjeevit ho utha.Usi din se Karwa Chauth manaayi jaati hai aur vrat rakha jaata hai.

He Karwa Chauth Mata! Jaise aapne Veeravati ke pati ki raksha ki, vaise hi sabhi suhagin mahilaon ke patiyon ki raksha karna. Is katha ko padhne aur sunne waale sabhi bhakton par apni kripa banaaye rakhna.

Karwa Chauth Mata Ki Jai!