Maa Kalaratri Katha

Ek samay Shumbh-Nishumbh tatha Raktbeej naam ke raakshason ne Swarg Lok mein Traahimaam macha diya tha. Unke bhay se sabhi devta Kailash Parvat par Bhagwan Shiv se sahaayata maangne ke liye gaye. Tab Bhagwan Shiv ne Mata Parvati se devtaon ki raksha karne ka anurodh kiya.

Maa Parvati ne apne tej se Maa Durga ko prakat kiya, jinhone raakshason ki sena ke saath bhayankar yuddh kiya. Maa ne Shumbh-Nishumbh raakshason ka vadh kar diya, kintu jab Raktbeej ka vadh kiya, tab uske shareer se nikli rakt ki boondein bhoomi par giri. Us raakshas ke rakt ki jitni bhi boondein bhoomi par giri, usse utne hi Raktbeej raakshason ka aur nirmaan ho gaya. Phir Durga Maa ne un Raktbeejon ka bhi vadh kar daala, lekin unke rakt ki bhi jitni boondein bhoomi par giri, usse aur Raktbeej ban gaye.

Yeh dekhkar Durga Maa ne apni shakti se ek aur Mata ka nirmaan kiya, jinka naam Kaalratri tha. Yeh Mata apna bhayankar roop liye hue thi. Uske baad jaise hi Maa Durga Raktbeej ka vadh karti, to uske shareer ke rakt ki boondein Maa Kaalratri bhoomi par girne se pehle hi pee jaati. Is prakaar Maa Durga ne ek-ek karke sabhi Raktbeej raakshason ka vadh kar diya tatha Maa Kaalratri ne unka rakt pee liya aur raakshason ka sampoorn naash ho gaya.