Yamuna Ji Ki Katha
Pauranik katha ke anusaar, Yamuna Ji Bhagwan Surya Narayan aur unki patni Sangya (Vishwakarma ki putri) ki santaan hain. Mrityu ke devta Yamraj aur nyaay ke devta Shanidev inke bhai hain.
Suryadev ka tej aur prakash itna teevra tha ki Devi Sangya use sahan nahi kar paati thi aur unke saamne apni aankhein band kar leti thi. Isse krodhit hokar Suryadev ne kaha ki tumhari is chanchalta ke kaaran jo kanya hogi, vah chanchal dhaara ke roop mein bahegi.
Iske baad Devi Yami (Yamuna) ka janm hua. Baad mein, Yamuna Ji ne Kalind Parvat (Yamunotri) par tapasya ki, jiske kaaran inka ek naam Kalindi bhi pada.
Bhai Yamraj Aur Yamuna Ji Ki Katha (Bhai Dooj Ka Mahatva)
Yamuna Ji ka apne bade bhai Yamraj se bahut gehra prem tha. Yamraj apne kaaryon mein vyast rehne ke kaaran apni behan ke ghar nahi ja paate the. Kartik maas ke shukla paksh ki Dwitiya tithi ko Yamuna Ji ke baar-baar bulaane par Yamraj unke ghar bhojan karne pahunche.Yamuna Ji ne bahut aadar-satkaar kiya, bhai ko tilak lagaya aur apne haathon se swaadisht bhojan karaya.
Prasann hokar Yamraj ne apni behan se vardaan maangne ko kaha. Yamuna Ji ne vardaan maanga:
"He Bhaiya! Jo bhi vyakti aaj ke din (Bhai Dooj) Yamuna nadi mein snaan karega aur apni behan ke ghar jaakar bhojan karega, use akaal mrityu ka bhay nahi hoga aur vah Yam lok ki yaatanaon se mukt ho jaayega."Yamraj ne 'Tathastu' kaha aur tabhi se Bhai Dooj (Yam Dwitiya) ka tyohar manaaya jaane laga.
