Shri Lalita Katha

Pauranik katha ke anusaar Devi Lalita Aadi Shakti ka varnan Devi Puran se prapt hota hai. Naimisharanya mein ek baar yagya ho raha tha jahan Daksha Prajapati ke aane par sabhi devta gan unka swagat karne ke liye uth khade hue. Lekin Bhagwan Shankar wahan upasthit hone ke baavajood bhi nahi uthe. Isi apmaan ka badla lene ke liye Daksha ne apne yagya mein Shiv ji ko aamantrit nahi kiya. Jab is baat ka pata Maa Sati ko chala, tab ve bina Bhagwan Shankar se anumati liye apne pita Raja Daksha ke ghar pahunch gayin. Us yagya mein apne pita ke dwara Bhagwan Shankar ki ninda sunkar aur swayam ko apmaanit hote dekhkar unhone usi agni kund mein koodkar apne praan tyaag diye. Bhagwan Shiva ko jab is baat ki jaankari hui, tab ve Maa Sati ke prem mein vyaakul ho gaye aur unhone Maa Sati ke sharir ko kandhe par rakhkar idhar-udhar unmat bhaav se ghoomna shuru kar diya. Bhagwan Shankar ki is sthiti se vishwa ki sampoorn vyavastha chhinn-bhinn hone lagi. Aise mein vivash hokar Bhagwan Vishnu ne apne Sudarshan Chakra se Maa Sati ke sharir ke tukde-tukde kar diye. Jiske baad Maa Sati ke sharir ke ang vibhinna sthanon par gir gaye aur un angon se Shakti vibhinna roopon mein wahan virajmaan ho gayin. Ve sabhi sthaan Shaktipeeth ke roop mein prasiddh hue. Mahadev bhi un sthanon par Bhairav ke vibhinna roopon mein virajmaan hain. Naimisharanya mein Maa Sati ka hriday gira tha. Naimish ek Lingdharini Shaktipeeth sthal maana jaata hai, jahan ling swaroop mein Bhagwan Shiva ki pooja ki jaati hai aur wahi Maa Lalita Devi ka prasiddh mandir bhi sthit hai. Mandir ke dwar par hi Panchprayag teerth vidyamaan hai. Bhagwan Shankar ko hriday mein dhaaran karne ke kaaran Sati Naimish mein Lingdharini naam se vikhyat huiं aur unhe Lalita Devi ke naam se pukara jaane laga. Ek anya katha ke anusaar Lalita Devi ka pradurbhav tab hua jab Brahma ji dwara chhoda gaya chakra Paatal ko samaapt karne laga. Is sthiti se vichlit hokar rishi-muni bhi ghabra gaye aur sampoorn Prithvi dheere-dheere jalmagn hone lagi. Tab sabhi rishi Mata Lalita Devi ki upasana karne lage. Rishiyon ki prarthana se prasann hokar Devi Lalita prakat huiं aur unhone us vinaashkari chakra ko thaam liya. Maa Lalita Devi ke divya prabhav se srishti ko punah navjeevan prapt hua aur sansar mein shaanti sthapit ho gayi।