Krishan Ji Ki Katha

Har saal Bhadrapad maah ki Krishna Paksh ki Ashtami tithi ko Shri Krishna Janmashtami ka tyohar manaya jata hai. Is pavitra avsar par bhaktjan Kanha Ji ki bhakti karte hain, bhajan-kirtan gaate hain aur Shri Krishna Chalisa ka paath karte hain. Janmashtami ka parv Shri Krishna Janm Katha ke bina adhura mana jata hai.

Ek samay Devaraj Indra ne Devarshi Narad se puchha, "He Munishreshth! Sabhi vraton mein sabse uttam vrat kaunsa hai?" Narad Ji ne kaha, "Dwapar Yug mein Kans naam ka ek atyant paapi aur krur daitya tha. Uski sundar behen Devaki ka vivaah Vasudev Ji ke saath hua tha. Vivaah ke samay aakashvani hui ki Devaki ki aathvi santan Kans ka vadh karegi. Yah sunkar Kans krodhit ho gaya aur usne Devaki aur Vasudev ko karagar mein daal diya. Vasudev ne Kans ko vachan diya ki ve apni har santan use saunp denge. Iske baad Kans ne Devaki ke ek-ek karke chhah putron ka vadh kar diya. Bhagwan Vishnu ke aadesh se Yogmaya ne Devaki ke saatve garbh ko Rohini ke garbh mein sthaapit kar diya, jo baad mein Balram Ji ke roop mein janme."

Kans ne samjha ki Devaki ka saatva garbh nasht ho gaya hai aur vah aathvi santan ki pratiksha karne laga. Bhadrapad maah ki Krishna Paksh Ashtami ki madhyaratri mein Rohini Nakshatra aur shubh yog mein Bhagwan Shri Krishna ka janm hua. Janm ke samay ghana andhkaar chhaya hua tha aur musaladhar varsha ho rahi thi. Bhagwan ki maya se karagar ke sabhi dwar khul gaye aur pahredar so gaye. Devaki ne Vasudev Ji se kaha ki ve is divya balak ko Gokul mein Nand Baba ke ghar chhod aayen.

Vasudev Ji Shri Krishna ko tokri mein rakhkar Yamuna tat par pahunche. Yamuna ji us samay ufaan par thi, lekin Bhagwan ke charanon ka sparsh paate hi unhone Vasudev Ji ko maarg de diya. Bhagwan Sheshnag ne apne phan failakar Shri Krishna ko varsha se bachaya. Vasudev Ji Gokul pahunche aur Nand Baba ke ghar janmi navjat kanya ko lekar wapas karagar aa gaye. Jab Kans ko us kanya ke baare mein pata chala to usne use chattan par patak kar maarna chaha, lekin vah Yogmaya ke roop mein aakash mein prakat ho gayi aur boli, "He Kans! Tera kaal janm le chuka hai aur samay aane par tera vadh karega." Itna kahkar vah antardhyan ho gayi.

Kans bhaybheet ho gaya aur usne Putana rakshasi ko Shri Krishna ka vadh karne bheja. Putana ne vish mila hua doodh pilakar anek balakon ko maara tha, lekin jab usne Shri Krishna ko stanpan karaya to Bhagwan ne doodh ke saath uske praan bhi kheench liye. Is prakar Putana ka vadh ho gaya. Iske baad Kans ne anek rakshason ko bheja, lekin Shri Krishna ne sabka sanhaar kar diya. Kesi naamak daitya ghode ka roop dharan karke aaya, lekin Shri Krishna ne uska vadh kar diya. Arishtasur bail ke roop mein aaya aur vah bhi Bhagwan ke haathon maara gaya. Kalakhya naamak daitya kauwe ka roop dharan karke aaya, lekin Shri Krishna ne uska bhi ant kar diya.

Ek din Nand Baba ko Kans ne aadesh diya ki ve uske liye Parijat ke pushp lekar aayen. Is ghatna ke dauran Shri Krishna khelte-khelte apni gend Yamuna mein phenk dete hain aur use laane ke liye Yamuna mein kood jaate hain. Wahan unki bhent Kaliya Naag se hoti hai. Kaliya Naag Shri Krishna se yuddh karta hai, lekin Bhagwan uske phanon par nritya karte hue use parajit kar dete hain. Kaliya Naag aur uski patni Bhagwan se kshama maangte hain. Tab Shri Krishna use Yamuna chhodkar samudra mein jaane ka aadesh dete hain aur Yamuna ka jal phir se pavitra ho jata hai. Kaliya Naag Bhagwan ko Parijat ke divya pushp bhent karta hai.

Samay beetne par Kans ke mantri Chanur ne Kans ko salah di ki Shri Krishna aur Balram ko Mathura bulakar mallayuddh mein marwa diya jaaye. Kans ne Akrur Ji ko Gokul bheja. Akrur Ji Shri Krishna aur Balram ko Mathura le aaye. Mathura pahunchkar Shri Krishna ne Kubja ka kubad theek kiya, Kuvalayapeed naamak hathi ka vadh kiya aur Shiv Dhanush ko tod diya. Akhade mein Chanur aur Mushtik jaise balwaan pehalwanon ko parajit kar diya.

Ant mein Shri Krishna Kans ke saamne pahunche aur bole, "He Kans! Main wahi Devaki ka aathva putra hoon jiske bhay se tum jeevan bhar darte rahe ho." Itna kahkar Bhagwan Shri Krishna ne Kans ko pakadkar bhoomi par patak diya aur uska vadh kar diya. Kans ke marne par devtaon ne pushp varsha ki aur sampoorn praja anandit ho uthi. Iske baad Shri Krishna ne apne mata-pita Vasudev aur Devaki ko karagar se mukt karaya aur Mathura ko Kans ke atyachar se mukti dilayi.

Narad Ji ne Indra se kaha ki jo vyakti shraddha aur bhakti ke saath Janmashtami ka vrat rakhta hai, Shri Krishna Janm Katha ka shravan karta hai aur Bhagwan Shri Krishna ka smaran karta hai, vah is lok mein sukh aur samriddhi prapt karta hai aur ant mein moksh ko prapt hota hai.