Maa Skandamata Katha

Pahadon Par Rehkar Sansarik Jeevon Mein Navchetna Ka Nirman Karne Wali Skandmata. Navratri Mein Panchve Din Is Devi Ki Puja-Archana Ki Jaati Hai. Kehte Hain Ki Inki Kripa Se Moodh Bhi Gyani Ho Jaata Hai. Skand Kumar Kartikeya Ki Mata Hone Ke Karan Inhe Skandmata Naam Se Abhihit Kiya Gaya Hai. Inke Vigrah Mein Bhagwan Skand Baal Roop Mein Inki God Mein Virajit Hain.

Is Devi Ki Chaar Bhujaayein Hain. Ye Daayin Taraf Ki Upar Wali Bhuja Se Skand Ko God Mein Pakde Hue Hain. Neeche Wali Bhuja Mein Kamal Ka Pushp Hai. Baayin Taraf Upar Wali Bhuja Varadmudra Mein Hai Aur Neeche Wali Bhuja Mein Kamal Pushp Hai. Inka Varn Ekdam Shubhrah Hai. Ye Kamal Ke Aasan Par Virajmaan Rehti Hain. Isiliye Inhe Padmasana Bhi Kaha Jaata Hai. Singh Inka Vaahan Hai.

Shastron Mein Inka Kaafi Mahatva Bataya Gaya Hai. Inki Upasana Se Bhakt Ki Saari Ichchhayein Poori Ho Jaati Hain.Bhakt Ko Moksh Milta Hai. Suryamandal Ki Adhishthatri Devi Hone Ke Karan Inka Upasak Alaukik Tej Aur Kantimay Ho Jaata Hai. Atah Mann Ko Ekagra Aur Pavitra Rakhkar Is Devi Ki Aaradhana Karne Wale Sadhak Ya Bhakt Ko Bhavsagar Paar Karne Mein Kathinai Nahi Aati Hai. Unki Puja Se Moksh Ka Marg Sulabh Hota Hai.Yeh Devi Vidwanon Aur Sevakon Ko Paida Karne Wali Shakti Hain, Yaani Chetna Ka Nirman Karne Wali Hain. Kehte Hain Ki Kalidas Dwara Rachit Raghuvansham Mahakavya Aur Meghdoot Ki Rachnayein Skandmata Ki Kripa Se Hi Sambhav Hui.