Shri Ram Ki Katha

Bhagwan Shri Ram ki jeevan katha Hindu dharm ki sabse pavitra aur prernaadayak kathao me se ek maani jaati hai. Shri Ram Bhagwan Vishnu ke 7ve avataar the, jinhone dharm ki raksha aur adharm ke naash ke liye prithvi par janm liya. Unki katha hume satya, maryada, tyaag, prem aur kartavya ka marg sikhati hai.

Bahut samay pehle Ayodhya nagri me Raja Dashrath rajya karte the. Unki 3 ranian thi — Kaushalya, Kaikeyi aur Sumitra. Lambe samay tak santaan na hone ke kaaran Raja Dashrath ne putra prapti yagya karaya. Yagya ke phal swaroop Bhagwan Shri Ram ka janm Mata Kaushalya ke garbh se hua. Unke saath Bharat, Lakshman aur Shatrughna ka bhi janm hua.

Charo rajkumar bade prem se pale-badhe. Shri Ram bachpan se hi vinamra, veer, dayalu aur dharm priya the. Guru Vashishth se unhone shiksha prapt ki. Baad me Maharishi Vishwamitra unhe aur Lakshman ko apne saath van me le gaye, jahan Shri Ram ne Tadaka aur anya raakshaso ka vadh kar rishiyo ki raksha ki.

Iske baad ve Mithila pahunche, jahan Raja Janak ne apni putri Sita ke swayamvar ka aayojan kiya tha. Swayamvar me Bhagwan Shiv ka vishal dhanush rakha gaya tha, jise uthana asambhav maana jata tha. Shri Ram ne sahajta se dhanush uthakar tod diya. Isse prasann hokar Mata Sita ne Shri Ram ko apna pati sweekar kiya aur dono ka vivaah hua.

Kuch samay baad Raja Dashrath ne Shri Ram ko Ayodhya ka raja banane ka nirnay liya. Lekin Kaikeyi ko apni daasi Manthara ke behkave me aakar 2 vardaan yaad aa gaye. Unhone Bharat ke liye rajgaddi aur Shri Ram ke liye 14 varsh ka vanvaas maang liya. Pita ke vachan ki maryada rakhne ke liye Shri Ram ne bina kisi virodh ke vanvaas sweekar kar liya. Mata Sita aur bhai Lakshman bhi unke saath van chale gaye.

Vanvaas ke dauran Shri Ram ne anek rishiyo ke darshan kiye aur raakshaso ka vinaash kiya. Ek din Lanka ke Raja Ravan ki behen Shoorpankha ne Shri Ram se vivaah ka prastaav rakha, lekin asweekar hone par usne Mata Sita ko nuksaan pahunchane ka prayas kiya. Lakshman ne uska apmaan kar diya. Isse krodhit hokar Ravan ne chal se Mata Sita ka haran kar liya aur unhe Lanka le gaya.

Sita Mata ki khoj me Shri Ram ki mitrata Hanuman ji aur Sugriv se hui. Hanuman ji ne samudra paar karke Lanka me Mata Sita ko khoj nikala aur Shri Ram ka sandesh diya. Iske baad Shri Ram ne vanar sena ke saath samudra par Ram Setu banaya aur Lanka par aakraman kiya.

Lanka me bhayankar yudh hua. Shri Ram ne Ravan, Kumbhakaran aur Meghnad jaise shaktishali raakshaso ka ant kiya. Ant me Ravan ka vadh kar unhone dharm ki vijay sthapit ki aur Mata Sita ko wapas prapt kiya.

Vanvaas poora hone ke baad Shri Ram, Sita aur Lakshman Ayodhya laut aaye. Ayodhyavaasiyo ne deep jalakar unka swagat kiya. Tabhi se Deepawali ka parv manaya jata hai. Shri Ram ka rajya “Ram Rajya” kehlaya, jahan sabhi log sukhi aur surakshit the.

Bhagwan Shri Ram ko Maryada Purushottam kaha jata hai kyunki unhone jeevanbhar satya, dharm, kartavya aur aadarsho ka palan kiya. Unki katha hume sikhati hai ki kathin paristhitiyo me bhi dharm aur satya ka saath kabhi nahi chhodna chahiye.