Tulasi Mata Katha

Ek baar Shiv ne apne tej ko samudra mein phenk diya tha. Usse ek mahatejasvi balak ne janm liya. Yah balak aage chalkar Jalandhar ke naam se parakrami daitya raja bana. Iski rajdhani ka naam Jalandhar nagari tha.

Daityaraj Kalnemi ki kanya Vrinda ka vivaah Jalandhar se hua. Jalandhar maharakshas tha. Apni satta ke mad mein choor usne Mata Lakshmi ko paane ki kamna se yuddh kiya, parantu samudra se hi utpann hone ke kaaran Mata Lakshmi ne use apne bhai ke roop mein sweekar kiya. Vahan se parajit hokar vah Devi Parvati ko paane ki lalasa se Kailash parvat par gaya.

Bhagwan Devadhidev Shiv ka hi roop dhar kar Mata Parvati ke sameep gaya, parantu Maa ne apne yogbal se use turant pehchan liya tatha vahan se antardhyan ho gayin. Devi Parvati ne kruddh hokar saara vritant Bhagwan Vishnu ko sunaya. Jalandhar ki patni Vrinda atyant pativrata stri thi. Usi ke pativrat dharm ki shakti se Jalandhar na to maara jata tha aur na hi parajit hota tha. Isiliye Jalandhar ka naash karne ke liye Vrinda ke pativrat dharm ko bhang karna bahut aavashyak tha.

Isi kaaran Bhagwan Vishnu Rishi ka vesh dharan kar van mein ja pahunche, jahan Vrinda akeli bhraman kar rahi thin. Bhagwan ke saath do mayavi rakshas bhi the, jinhen dekhkar Vrinda bhaybheet ho gayin. Rishi ne Vrinda ke saamne pal mein donon ko bhasm kar diya. Unki shakti dekhkar Vrinda ne Kailash parvat par Mahadev ke saath yuddh kar rahe apne pati Jalandhar ke baare mein poocha. Rishi ne apne maya jaal se do vanar prakat kiye. Ek vanar ke haath mein Jalandhar ka sir tha tatha doosre ke haath mein dhad. Apne pati ki yah dasha dekhkar Vrinda moorchhit hokar gir padi. Hosh mein aane par unhone Rishi roopi Bhagwan se vinati ki ki vah uske pati ko jeevit karen.

Bhagwan ne apni maya se punah Jalandhar ka sir dhad se jod diya, parantu swayam bhi vah usi sharir mein pravesh kar gaye. Vrinda ko is chhal ka tanik bhi aabhas na hua. Jalandhar bane Bhagwan ke saath Vrinda pativrata ka vyavahar karne lagi, jisse uska satitva bhang ho gaya. Aisa hote hi Vrinda ka pati Jalandhar yuddh mein haar gaya.

Is saari leela ka jab Vrinda ko pata chala, to usne kruddh hokar Bhagwan Vishnu ko hridayheen shila hone ka shraap de diya. Apne bhakt ke shraap ko Bhagwan Vishnu ne sweekar kiya aur Shaligram patthar ban gaye. Srishti ke palankarta ke patthar ban jaane se brahmand mein asantulan ki sthiti ho gayi. Yah dekhkar sabhi Devi-Devtaon ne Vrinda se prarthana ki vah Bhagwan Vishnu ko shraap mukt kar de.

Vrinda ne Bhagwan Vishnu ko shraap mukt kar swayam aatmadah kar liya. Jahan Vrinda bhasm huin, vahan Tulsi ka paudha uga.

Bhagwan Vishnu ne Vrinda se kaha: He Vrinda. Tum apne satitva ke kaaran mujhe Lakshmi se bhi adhik priya ho gayi ho. Ab tum Tulsi ke roop mein sada mere saath rahogi. Tab se har saal Kartik mahine ke Dev-Uthavani Ekadashi ka din Tulsi Vivah ke roop mein manaya jata hai. Jo manushya bhi mere Shaligram roop ke saath Tulsi ka vivaah karega use is lok aur parlok mein vipul yash prapt hoga.

Usi daitya Jalandhar ki yah bhoomi Jalandhar naam se vikhyat hai. Sati Vrinda ka mandir Mohalla Kot Kishanchand mein sthit hai. Kahte hain ki is sthan par ek prachin gufa bhi thi, jo seedhi Haridwar tak jaati thi. Sacche man se 40 din tak Sati Vrinda Devi ke mandir mein pooja karne se sabhi manorath poorn hote hain.

Jis ghar mein Tulsi hoti hain, vahan Yam ke doot bhi asamay nahin ja sakte. Mrityu ke samay jiske praan manjari rahit Tulsi aur Ganga jal mukh mein rakhkar nikal jate hain, vah paapon se mukt hokar Vaikunth dham ko prapt hota hai. Jo manushya Tulsi va Aamvalon ki chhaya mein apne pitron ka shraddh karta hai, uske pitar moksh ko prapt ho jate hain.