Saraswati Mata Katha

Saraswati mata-pita ki badi hi laadli ladki thi. Isi se uske laalan-paalan me mata-pita ne kuch bhi utha nahi rakha tha. Usko kahin jara si bhi manovedna ho, yeh mata-pita ko asahya tha. Iklauti santaan thi, sampann ghar tha aur mata-pita ke hridayon me sneh ki sarita umadti thi. Barah varsh ki avastha me uska vivaah ek sampann ghar ke Sudarshan naamak ladke se kar diya gaya. Teen saal baad dviragaman hua. Saraswati ke vivaah aur dviragaman me bahut badi dhanrashi kharch ki gayi, prachur dahej diya gaya.

Saraswati sachmuch yogbhrashta thi. Lagbhag pandrah varsh ki avastha me uske sharir aur man ko chot pahunchane wali koi bhi chhoti-si ghatna nahi hui. Vah sab prakar se bade aaram se rahi, par uska man kabhi bhi sansar ke bhogon me fansa nahi. Aaram ki saamagriyan prachur maatra me thi, par uska man unse sada udaasin-sa rehta tha. Mata-pita ko dukh na ho, isliye vah prakat me sab kuch sweekar kar leti thi; parantu uska man unko sweekar nahi karta tha. Ghar me Shri Gopalji ka mandir tha. Shrutdev naamak boodhe pujari bade hi bhaktibhav se Shri Gopalji ki pooja karte the. Unke koi santaan nahi thi. Unka Gopalji me vatsalyabhav tha. Ve bade sneh se Gopalji ko bhog lagaya karte. Unke man me Gopalji jad swarnpratima nahi the, Sachchidanandghan Bhagwan the. Man me hi nahi, bhakt Shrutdev ki shuddh bhavna ke anusaar Bhagwan unse sthool vyavhaar bhi aisa hi karte the. Par is baat ka rahasya Shrutdev ne kisi ko nahi bataya. Saraswati ke mata-pita Shrikarti tatha Matimaan bhi is rahasya se aparichit the. Saraswati chhoti umr se hi mandir me jaakar baithti, khelti, Pujariji ko pooja aarti tatha bhog-raaga ko bade chaav se dekha karti. Pujariji chhoti bachchi samajhkar usse koi baat chhipate nahi the. Iske atirikt unka Saraswati ke prati bada sneh tha, ve use apni sagi putri se badhkar maante the. Yah putri aur Thakurji Shri Gopalji praanpriyatam putra — is bhaav se Pujariji ka sneh dono me bant gaya tha. Unke is sambandh se Saraswati aur Gopalji me bhai-behan ka sambandh ho gaya tha. Chhoti balika apne Gopal bhaiya se bada pyaar karti. Baalyabhav se unhe khilaati-pilaati, unke saath khelti, shuddh premalaap karti. Shrutdevji bade prasann hote.

Saraswati ko buddhi bahut teevr thi. Vah Pujariji se Geeta-Ramayan, Puraan tatha anya shastragranth badi lagan se padhti aur samay-samay par Shri Bhagwan ke swaroop tatha leela ke sambandh me poocha karti. Shrutdevji ko vah pita se badhkar maanti aur unke updeshon aur vachanon ko kaaryaroop me parinat karne ki cheshta karti. Isse uska jeevan pavitra, bhaktimay ho gaya tha. Nau-das varsh ki avastha me use Shri Bhagwan ke darshan ka saubhagya prapt ho gaya tha. Uske saral aagrah se prasann hokar saakshaat prakat ho Bhagwan ne bhog aarog liya tatha kuch hi dino baad Shravani Purnima ke din uske dwara Rakshabandhan karvaya. Shrutdevji isse bade hi prasann hue. Iske baad to Shri Gopalji ke saath Saraswati ka bhai-behan ka sambandh itna spasht aur sudridh ho gaya tha ki dono jaane kitni baar mile aur kitni baar paraspar sukh-dukh ki charcha hui. Phir Gopal bhaiya ki sammati se hi Saraswati ne vivaah karna sweekar kiya.