Shri Khatu Shyam Katha

Mahabharat kaal mein lagbhag saadhe paanch hazaar varsh pehle ek mahaan atma ka avataran hua jise hum Bheem pautra Barbarik ke naam se jaante hain. Mahisagar Sangam sthit gupt kshetra mein Navdurgaon ki saatvik aur nishkaam tapasya kar Barbarik ne divya bal aur teen teer va dhanush prapt kiye. Kuch varsh uparant Kurukshetra mein Uplabhya naamak sthan par yuddh ke liye Kaurav aur Pandavon ki senaen ekatrit hui. Yuddh ka shankhnaad hone hi wala tha ki yah vritant Barbarik ko gyaat hua aur unhone Mata ka aashirvad le yuddhbhoomi ki taraf prasthan kiya. Unka irada tha ki yuddh mein jo bhi harega uski sahayata karunga. Bhagwan Shri Krishna ko jab yah vritant gyaat hua to unhone socha ki aisi sthiti mein yuddh kabhi samapt nahin hone wala.

Atah unhone Brahman ka vesh dharan kar Barbarik ka marg rok kar unse poocha ki aap kahan prasthan kar rahe hain. Barbarik ne apna dhyey bataya ki vah Kurukshetra jaakar apna kartavya nirvah karenge aur is par Brahman roop mein Shri Krishna ne unhen apna kaushal dikhane ko kaha. Barbarik ne ek hi teer se ped ke sabhi patton ko bhed diya sivay ek patte ke jo Shri Krishna ne apne pairon ke neeche daba diya tha. Barbarik ne Brahman roopi Shri Krishna se prarthana ki ki vah apna pair patte ke upar se hataen varna aapka pair ghayal ho sakta hai.

Shri Krishna ne apna pair hata liya va Barbarik se ek vardaan manga. Barbarik ne kaha he yajmaan aap jo chahe maang sakte hain main vachan ka poorn palan karunga. Brahman roopi Shri Krishna ne sheesh daan manga. Yah sunkar Barbarik tanik bhi vichalit nahin hue parantu unhone Shri Krishna ko apne vaastavik roop mein darshan dene ki baat ki kyonki koi bhi saadharan vyakti yah daan nahin maang sakta. Tab Shri Krishna apne vaastavik roop mein prakat hue. Unhone Mahabali, tyagi, tapasvi veer Barbarik ka mastak Ranchandika ko bhent karne ke liye manga aur saath hi vardaan diya ki Kaliyug mein tum mere naam se jaane jaoge. Meri hi shakti tum mein nihit hogi. Devgan tumhare mastak ki pooja karenge jab tak yah Prithvi, nakshatra, Chandrama tatha Surya rahenge tab tak tum, logon ke dwaara mere Shri Shyam roop mein poojniya rahoge. Mastak ko amrit se seencha aur ajar amar kar diya. Mastak ne sampoorn Mahabharat ka yuddh dekha evam yuddh ke nirnayak bhi rahe. Yuddh ke baad Mahabali Barbarik Krishna se aashirvad lekar antardhyan ho gaye.

Bahut samay baad Kaliyug ka prasaar badhte hi Bhagwan Shyam ke vardaan se bhakton ka uddhar karne ke liye vah Khatu mein chamatkari roop se prakat hue. Ek gaay ghar jaate samay raste mein ek sthan par khadi hokar chaaron thnon se doodh ki dhaaraen bahati thi. Jab gwale ne yah drishya dekha to saara vritant Bhakt Naresh (Khandela ke Raja) ko sunaya. Raja Bhagwan ka smaran kar bhav vibhor ho gaya. Swapn mein Bhagwan Shri Shyam Dev ne prakat hokar kaha main Shyamdev hoon jis sthan par gaay ke than se doodh nikalta hai, vahan mera Shaligram shilaroop vigrah hai, khudai karke vidhi vidhan se pratishthit karwa do. Mere is shila vigrah ko poojne jo Khatu aayenge, unka sab prakar se kalyan hoga. Khudai se prapt shilaroop vigrah ko vidhivat shastron ke anusar pratishthit karaya gaya.

Chauhan Rajputon mein Narbadar Kanwar hui hain jinhone is vigrah ko aatataiyon ke vidhvans se bachane hetu jhopde mein rakha evam seva pooja ki. Aurangzeb ke shasankaal mein purane mandir ka vidhvans ho gaya tatha uske baad jahan Bhagwan Shri Shyam Dev ka vigrah pratishthit kiya gaya vah aaj bhi vidyamaan hai jahan desh ke sabhi konon se Shyam premi pooja archana evam darshanarth aate hain. Ab Narmada Kanwar ke khandan ke hi Chauhan Rajput pujari hain.