Shri Narayan Katha

Kaushalpur mein ek raja tha Tungdhwaj. Praja uski chhatrachhaya mein anandpoorvak rah rahi thi. Raja Tungdhwaj apni praja ke sukh-dukh ka bahut dhyan rakhta tha. Lekin ek baar usne Satyanarayan Bhagwan ka prasad grahan nahin kiya. Tab Shri Satyanarayan Bhagwan ne raja ko prasad grahan na karne ka dand diya.

Ek din Raja Tungdhwaj jangal mein hinsak pashuon ka shikar karne nikla tha. Shikar ka peecha karte hue vah apne sainikon se alag ho gaya aur usne der tak hinsak janwaron ka shikar kiya. Atah kuch der vishram karne ke liye vah ek vriksh ke neeche baith gaya. Sameep hi kuch charwahe Shri Satyanarayan Bhagwan ki pooja kar rahe the. Raja ne unke paas se guzarte hue Satyanarayan Bhagwan ko namaskar nahin kiya. Charwahon ne raja ko pooja ke baad prasad diya, to raja ne prasad bhi grahan nahin kiya aur ghode par sawar ho apne nagar ki or chal diya. Raja jab nagar mein pahunchaa to dekha ki uska saara dhan-vaibhav nasht ho chuka hai. Shri Satyanarayan ke prakop se raja nirdhan ho gaya.

Tab Rajjyotishi ne raja se kaha, "Maharaj! Aapse avashya hi koi bhool hui hai. Agar aap us bhool ka prayashchit kar len to sabkuch pehle jaisa ho jayega." Raja ko turant apni bhool ka smaran ho aaya. Atah mandir mein jaakar raja ne Shri Satyanarayan Bhagwan se kshama maangi aur unki pooja ki. Pooja ke baad prasad grahan karne se Shri Satyanarayan Bhagwan ki anukampa se chamatkar hua. Raja ka khoya vaibhav punah laut aaya. Shri Satyanarayan Bhagwan ki kripa se jeevan ke sabhi sukhon ka bhog karte hue ant mein raja moksh ko prapt hua.

Is prakar Shri Satyanarayan Bhagwan ke vrat aur pooja ko jo bhi manushya karta hai, uske sabhi dukh, chintaen nasht hoti hain. Sabhi manokamanon ko prapt kar vah manushya moksh paakar seedhe Vaikunth Dham ko jata hai. Shri Soot Ji ne kuch pal rukkar kaha, "He Shreshth Muniyo! Shri Satyanarayan Bhagwan ke vrat ko poorvjanm mein jin logon ne kiya unhen doosre janm mein bhi sabhi tarah ke sukh prapt hote hain."

Vriddh Shatanand Brahman ne poorvjanm mein Bhagwan Satyanarayan ka vidhivat vrat kiya, ve doosre janm mein Sudama ke roop mein Bhagwan ki pooja karte hue ant mein moksh ko prapt kar Vaikunth Dham ko chale gaye. Ulkamukh Raja agle janm mein Raja Dasharath ke roop mein moksh ko prapt karke Vaikunth ko gaye. Vyapari ne Moradhwaj ke roop mein janm liya aur apne putra ko aare se cheerkar Bhagwan ki anukampa se Vaikunth ko prapt kiya. Raja Tungdhwaj agle janm mein Manu ke roop mein janm lekar sadkarm karte hue moksh ko prapt kar Vaikunth Dham ko chale gaye.